ጡፋ ቲህረድዳ  (ግጥም - በቤተ መስቃን ቋንቋ) (በአወል አህመዲን)

አጅሜት ቴተምና በሜኔት የትናደች

ሉባም ተባልቴቴት ብዥ አትናቋዘች

ፏቀቅዬት ቴሞጥል ብቅሌት ያጠረቀች

ባንቋ ትበቂልም ገሜም ያማከረች

ይፍታንቄ ኢንቂርፊት ክቻም ተያዥና

ሰቤት አምዛዘለም ጉራ ያዶሠና

ስርም ፈያ አንሀን ያወናቹ ሜና

ተገረድ የወጥቀል አጅም አንታመና

ጔዝመኘ ዳሬታ ሜና ቡቡቴታ

የይትም ተራ ሰላም ትትበኜ ባልቴታ

እንስ ተደፈና ብልቃት ኤላኜ

እንዝን ኤሶታዬ ኃሮቴት ኤትላኜ

ተይቲ ተሀለቀም ዬማ እንዳዱሌ

ቋፈቸ ይሀነባም ያድጋ ፊንጊሌ

ንሻ ቲያቌጣ ሲካም ባናምከከች

ደፈና ቲረዛ ጋራምባት ባነዥች

ማልም ቴሰጅና በሰር ቲቦትርያ

ታትመጌ ቤላባ ተስር ዋነኘያ

ሽቅታ ቲረዛ ወጠኜታን ጠላባ

ያነዥና እንም ጭዛ ይቅመጥልባ

እጉዣር ተይቡያ ጡፋ ቢህረድዳም

ደዲቀባ አያን ናጬ አንጫጨባም

ነን ተት ጭምጭማት ጡሌት ቲዬላባ

ቀልብ ቤዶግሳ ሠብሬታ ባንገባ

እጉዣር ጠላባም መጄታን ብትሼም

ቋመች አትበሄ ጊንዠ መከከባም

ውዶ ተፈይነት ጥርመቼት ቢሠታ

ሃሮት ኤታዥና ያሻሮ ደምዌታ

አጅግ ቲደበርባ ሠንዳ ሠበረባም

መተይነት ተሜጠቅ ኋባዬት ሃናናም

አንገት ትናነና ዋዞር አነሰናም

ኤገፍር ሮስነት ድጓ ገደረባም

ቂጭና በአብሌላ ያንቄ ሾለቀናም

አፈርቴት ትንኪዬት የክቻ ተሜናናም

(በአወል አህመዲን)