የመስቃን ብዙሃን መገናኛ አውታረ መረብ
Apr 4, 20191 min
ይቀጥሬ ይትሜና ቂጭሟኘ በመጥም
ያትመመጥ ቀቧጭም ይንዝን ንቅ ባንሃንም
ወትፋረህ ቲህረድድ ነብሲያ ባሰብነም
ደዲቀባ ቁረም የጔታ ቃር ረሸም
የቸኘ ባዘና ቴሰሊም አረጅም
ዙልም ድንቁርና ጠለማ ነገሰም
በሰብ ቃር ኤላቻ ምን ይቡሪኝ ጠፋም
የነብሲያ ፉጭም ምን ይቧጀኝ ሃነም
ዛዘር ኤትጔነዬ ዥንግ ተግመደለም
ዶንቃ ፌቅ ቺስ ቲቡሪ ተቃቃቴ ወጣም
ባፈር የነበረ እንም ስቁር ኤላም
በተት የነበረ ፉርም ኳተ አሰረም
ሜልቾ ቢጥራረ በጀፏር ተናቀም
እንም ዘንገተኘ ያጬማ ቀቧጭም
ባንጋቻ በትላሰ በጊየ ተነከሰም
የኩተና ዞየ በብርዛዝ ተሜናም
ሙራም ቴቁረ ሳምት ጀፏር ተጃፏርም
ኤበሎ ቴበሎ እሸትሾ ሸውም
እንም ዘንገተኘ ዮጀ ድገደገም
ሰስቲያ ያጓጂ ትራማ ተፈታም
መስቃን ያመሰረ ዋጂነት አቴበም
መሶ በሶረረሁ ኢፍትሊፍት አወናም
ፈያ ቲያቴላ በኦጀ አብላለጠም
ድረ ያንሰሟ ቃር ያናውኔ ቲሸዊ የነብሲ ተሬሳም
እንሲ ተግብቴ ዋጂ ሟረ ቋመም
ቶባ ባንቄፉና ፈትዋ ዋብ ቀረሰም
ሱልም ኤሰሊዮዬ የወማ አወናም
አንቄ ቲፍቴ ሃኖም ድለድግ ሳተንም
ስልሙሳል ቲሰሊ ቂያማ ቀረበም
አሊም ኢልመሁ ይውዴ ፈረንክ ናሙኝ ባረም
ደረሳም ተፈትዋመሁ ሪባ ንብራ ባረም
ቁልብዝ ክታበኘም የቲም ዋጋ ኤላም
አመኛትም ጠፋም ኤማራት አያሬ ብሶህም ኤጠርም
ጠናቃ ያጠርቄ ጎጋውታ ወተረም
በነብሲያ ጊፈ ዳር እምን ነቋልም
የክታበኘ ስስት ቁራንም ሃተረም
ትንም ቃር ያመጢ ተነገ ፏያተሁ የኳውታ ሸወም
ምን ይቡርኝ ቲህመትት ምን ይቧጀኝ ሃነም
ንቡርሁ ቢጭቋቋሽ ኤነሁ ባፈር ባረም
ይንጓደውታ ይውዴ ነብስሸሁ መች ሃረም
ቶባም ቴቶብትም ሰላተሁ ሰገደም
የክታበኘ ውዶ ያቂዳ ምሽት ኤላም
እንም ያባርር ሃም ዋጂመሁ ቀቧጭም
ከነ ቴድበበር ዘበነሁ ሰደበም
ወባጀ ይቡሪዬ ያጬማ ቀቧጭም
በኩልመኘ ፈረዝ የዜባ ከፏችም
ሻሜት ሙላ ጥወ በጉነን አዦርም
ንቡር ያቴዥዬ ጭምጭማት ቢረግዊም
ዘበን ህመተተም ጥወም ተሻሜተሁ አንሰበር ባረም
የዚ ኤበሁታ የቶባም ተሳልም
ወክቲ በደፈና አናኘ አጮረም
ሁትም ያነንቃር የኋረን ኤወደም
ከነ ይቧድሪዬ ሺሬ ፈረዝ ስረም
የዜባ ከፏችም ይፍትፍቴ ኋር ቧርም
ምሽራ ባናሰቧት የትሜናን ቴሰላም
የጉራ ያቴክሌ ገማም እንም ጫንም
ከነ ወሰጅቧ ዋቀቅል ቌሟንም
አንቌሁ ያንትኌረ ዋጂነተሁ አበም
መንካሁ ይነጂዬ ኩልመኘሁ አረጠም
ኤቦ ኤቦ ቧሪ የነብሲ ተሬሳም
ያፈር ነኔ ወጣም ቶባ ያለ መደር ዋጂነት አጮርም
ቾነም የሰቋሪ በቁመን ገለፈም
ጨኘት ተዛገገም ትናነን ቦረሰም
ሜጠቅ ቲቋሙነ መተይነት ሸበተም
እጉዣር ቲጠላ ዘንጋሁ ተክባሰሰም
የቧረን ቴሰላ ኢንካቢንኬ ባረም....2 !!
ተበርቼ ሰላም...