"የሮስ አናስረያ" (በአወል አህመዲን ሳሊሃ)
Updated: Jul 25, 2022
ጋዘኘ ገርማሜ ጋዘም ባቸንያ
ኤራቶ ባውዶተሁ በግርዝና ናጂያ
ጡር በጡር ይጫኜ በግሬድ እን ሙዌጠሪያ
እንዝዝ ዡዡ ቲብር አረጅም ቀቧያ
ተበሽር ድርቋሮ ዝሬት ልቋለቁያ
በሞጣም አሼጅም አረቁ አገለፉያ
በገኝ ባነ ጎንቱ በቱፍቱፍ ሙዌረቁያ
ፉጃም ተያቋሪ ሙሻሽ አቴንቀፉያ
ዶጓሽ ቴጠርያ ሙላሽም አጮሪያ
ይንስ ንቅመውታ ድግላየንሽ አንቧሪያ
በህር ተጃፏርም ወለብነት አቡያ
ጣንቤታን ቴወጣ ያዮት ይትቧደሪያ
በድርቋሮም ዝሬት በጡር አቸለፉያ
ደናሜት ሰሌላው ተሙስትም አንፋሁያ
አያን ተላሀናም ገቤም ተያስረያ
ሙላ ቴቀብልባ ታበሮስ ደቧሪያ
መተዮንሁ አትብሬ ቅጥል ሽምም አቡያ
ሙጥር ምዌጠርናም የብዥ እሞ ቧሪያ
ጓስነት ሜዘንም ይና ዘርንሽ ቧሪያ
ደቧር ድቧቧርም አሳቸች ሜዘንያ
ሶቢላም ቀቧርም በሽሜታ ሻጂያ
ገኜት አትዘግዴ ባማድ አብላለቁያ
ቅረር ተገባትም ተደን አብሳሰቁያ
ቡረሾም አታዤ ተሱት አሳቸቺያ
በዋጂ ጎባቢት ቤተን አሻመሁያ
አንፉ ጭውጭው ቲብር የደንበዬት አቡያ
ጉንድል ግሟደሊም በደኔንም ሼሙያ
አትም ታትህረድድ ልመ ታበችያ
የሙሽራ ሽሜታን ኑድመኘኘም ቧሪያ
ዛ ጌ ታነትወ ታንቄ ቢዠቡሪያ
ውዶ አነዥባ በጋዝ ባቸንያ
ሙዌጭም የሰቋሪ ሙጥር ስንክርትያ
ድረ ቢዘጉጂያ ታትጨኝ እምያ
የሱል ቢያርባ ታፍትነት ባሊቂያ
የሟንሽ ቲቡሪያ የገኝሁ ትብርያ
የሮስ ቲትሙዌነያ አቅል ታዴላያ
ፈያ ተምዌነናም የሁዌት አገቧያ
ቀልቃር ብትማች በደፈና ጮሪያ
የይትም ትትለታዬ ጓብሴት ሰጀጂያ
ሸቤም ቴትቋጠሪ አጋቴታን ሳሙያ
ስቴም ተያጉጅና ጓብበዬ ቧሪያ
ጢሮዬታን ጌነም ሰሜ ስን ሠቋሪያ
ንቅነት አጮርም ሉብቤርም ቧሪያ
አርጅ ቢዬለባ የዥማር ወዝገቢያ
ዠቧር ዥቧቧርም የፈያ ኤለያ
እንም ይቀናባ የቁና እም ፍኩንያ
ሽሜታ ቢነሼ ናጬ አትብርያ
ቁና ጌ ጠረያም ዠጠ ዮ ትብርያ
ይን እምም ሀነች የሮስ አናስረያ
መከከፌ ዳኮ ትኄት ደልጩሜያ
አወል አህመዲን ሳሊሃ
ሪያድ ሳዑዲ አረቢያ
ሐምሌ 21 2012 ዓም