ልመና የዘቡሪ ክፍል - 01 (በመልካ አምዛ)
Updated: Jul 25, 2022
ጌትዬ ኧዘነ የዚ ገዋ ግወሳ
ወግድ ወፍታ ኤሂር የዘንጋም ቴነሳ
ግወብሳውታን ብዠው ያለደንመውታ
ያኸ ምን ይውጅከ ትሂር እንመውታ
ጌትዬ ቢሰሊ ቲውድ ወይ አትቃር
የመስቃን ትትኸልቅ ያብሰበስኽወን አፈር
ቢያግየና ቃሩ ወይሽ ቢመርአዘር
ቤቴ የርክቡም የሳልከ ዚቃር
መስቃን ይቡርከ ሰብ አትገደር ወኔት
አንትኽየረ ባሸ ይፈጅኸው አትባት
ቅረር ወጣ ይቡርም ይቀቡጪከ ገባት
የዚ ባሸ ጭዛ አራኽብ አትሰልትት
ግርዝና የሳልም ሰፎ ያውጨ በሶት
ዲና በቢዳራ ደምበል ዳር ቲሰጂ
መደለና የገኝ የለፎይ ቲይውጂ
በሹራ ኤምሠርኹ እክም ቲቅየልጂ
የድረ ፈያ ሰቦች ነፊሳ ወልጊቾ
ነሙሀመድ ጁሀር ናዉገሬ አዝማቸ
ዚገኝ ቲያቀኖ በክናንም በርባት
በሹራ ኤምሰርኹ ወይም በጊናት
በብዠ ልፋትዋ ባብዣኽኖ ሞቱ
መቸሽ ምን ይሸኩች የዋጦ ጄነት
የሰስቲያ ዴንጋ ያትጌ ደረቦ
ደጎ በመጬቦ ኬረሶ ቢዛቦ
ቧርም ያደረሺዮ ኹትም በከረቦ
እንም በዋተውታው ያውጅኩ ቅረቦ
የትራማሚ ዴንጋ ኢና ኧብስነ ቲብሮ
የምወተሚ ምወተም ያኖሚ ዘነኖ
ኧኽዋውታን የሳሊዮ ፈዶም ግወጀ ቴብሮ
የአበጋዝ በድሩዋ የአደም የመኔሮ
…ይቄጥል
(በመልካ አምዛ)