ልመና የዘቡሪ - 5 (በመልካ አምዛ)
Updated: May 2, 2020
በመሥቃን ወረጀ ፋፍ የምን ይትፋጀ
የዲልቾ ሽፋ በጉራኤም ግወርጀ
የሁልባዶ ሙሄም ከነአዘር ውስጀ
የሥራጅ ቃሎሚ ተትኤማ አውርጀ
ዘንጋ በህኖ ያልቅ ዲናም ይስናጀ
ውሪበ ታውለሌ ግድየ ተጀሙሌ
እምብወር ተፎርገሌ ጎይባን ተደለሌ
የተብወን ታውገሬ ዶቢም ታዝማች ኤሌ
በዠጠሚ ሰንጋ አንትጠኘ መሌ
ገነሞ ይጨኒም ደልባር ይቸኖ ዳር
ገሜ ቢልበጥጦ ልከውታ ያዢ ዳር
ዱና ኧግር ኤህራ እንሽርብኘም ኤቅጥር
ምሽትም ሰንዳ ንሸ የጤዴንጋም እንጣር
ሰብቀኖ ማሬኖ ያብዲላ ሦሥትኖ
የጠቡቴ ዲኖ አረሺ የጥፋኖ መሦ የሰበርኖ
ባጋላ መሠና የጠቡቴ ዱና
ቁናጌቢቡነ ለንካሮ ኽወናነ
በለንካሮ ውጤ ትረፍ ባረ ሥልጤ
ስኮ ባረ ሜጤ
ጠብዌም የዳኳኸ ዲናም ኽወር ባጃኸ
የዲልቾ ሽፋ ሞጣውታ ባለፈ ተፋፍ በሴለፈ
በውቲ ሟይሰላ ምን ኧርጁ ያልፈ
የውትሮ ቅብ ንሴም ንቅብዋን ቲቸለፈ
ቴቀጥር ዛም ኤቸኝ በደም ቴጭፌፈ
ምሥ ወበር ሽፋው እንግወዲ የድፈፋ
ብምብወር በወልማ ዬከሶ ፎርግማ
ቀል የማቸጉርድ ጬትይኸን ጨለማ
ዬከሶ ዞጋራ ሽመሁ ሟይጠራ
አርብ የቅወረሺግወር ይበድር ታመራ
መሪ የቀብወጭነው ቲቀይ ቁናቁድራ
የፎርጌ ፋፍነት እምስተሁ ናውድሁ
ኤተውታ ንግፍርም ኤተሁ ናተዥሁ
ባጋላ ተትአዘር አርብ ቅወመም ቢቡሪ
እኳሽይድነብጤ ኤሰበ ይቀጥሬ
አቅም አማራሺ ኧጅለጅም ቅወጠሪ
ሹም ልማድመውታ የፎርጌ አቅየብወሪ
ዴንጋ ነኖ ቦንጂ ነከሊፋ ሜቺ ነኮሪ በነቺ
ተህኖጌ በኸን ጋዝም ኤስላቺ
በጠብጣባ ቡራት ገለዶ ቲሸለት
ሳሬ ፈረዝ ቲጠብጥ ያዠፋፍ ይዴሰት
መሌም ሂነሁ ይምወት
ይቄጥ
(በመልካ አምዛ)