• የመስቃን ብዙሃን መገናኛ አውታረ መረብ

"ቴጦፍ ምለዦውታን" (በአወል አህመዲን)

Updated: Jun 9, 2019



ዥማር መስቃነኛ ቴዥበር ሡለውታን

ገመያ ኑድመኘ ጉልሜ ያፍራነውታን

ተራዘን ጔዝመኛሁ ሡቢ ቅረረውታን

ፍርድም ቴግሟድሊ ረከበም ኢነውታን

ቴቆምር ዥነውታን አያንቱ ትሀውታን

ሜልቾ ቲጃፉርነ በዋጂ በህረውታን

ያለሽመሁ አጮሪም አድባር ጥሌለውታን

እድጉት ቲገባወ በቅል መገነውታን

ዝኘው ታያዛኝም የፈርዝ ዋዜውታን

ተያተርፉ ስወል በደንቃ ጡለውታን

ተውትም ባንጠቀለ ጃንጁሬ ዘረውታን

ነሳም ቲያድግወ ጥቡጨ ደገውታን

ቀባዴ የባረ ጉንን እሙጠውታን

ግሰስ አደገወ ጎንቱ ባሊቀውታን

እንቅል ቢዥቧርነ ቢቂሌ ቀልበውታን

ያንቋርስስ ፉጃውታን የድግ ቡምኮውታን

ዛረሁ የቁርስነ ድርማግ ጨኘተውታን

ኤማራት ያቀቡር ኢላጅ ክሸሾውታን

የለግም የስላወ ሺሬ ፈረዘውታን

ጎሜ ቴነብርወ ያትቧዳን ሡለውታን

የሀረ ያውድነ ኤርሳ ነልቡረውታን

ያጨምጭምም የረጊ ክቻ ቅባጨውታን

አያን ቢመክወ ተተት ረበቃውታን

ደፈናሁ ቢስለትት በትከባ ኤማውታን

ውርሽት ቅበተውታን ተንሻ በርቼውታን

ግርምሽ እርሜውታን የቢሌ ገሜውታን

ጊናት ቢዥንትወ ስቡር ቀለጠውታን

አረጔም ይቸኜ ጉሩጦ ድብረውታን

ቴበራም ቀቀዬ ቴጦፍ ምለዦውታን

ናዶት ቲትራከትወ የርባት ባሪታውታን

ክቻ ተራዘንም በሠብ ተት ወህነውታን

እጉዣር ብሠውታን በሜጠቅ መየውታን

ወላ ወንቄ ባረም እክም ተጉባውታን

በርቼ ፈግር ቤተሁ በሟሳ ቀነውታን

ወጋም አደጓንም ላኋንም ቀብረውታን ........!!!

(በአወል አህመዲን)

52 views

Copyright © 2018 Meskan Media Network - All Rights Reserved. E-mail : meskanmedia@gmail.com

  • YouTube - White Circle
  • White Spotify Icon
  • White Apple Music Icon
  • White Amazon Icon
  • White Facebook Icon
  • Twitter Clean