ያናቶ ቀቀብየ የቁንት የወረ
የጆማ ያሴማ ሙራ አፌጀረ
ዱዱቆ ደምትሃ ቴበኂ እሸረረ
አርባኘ ቴቀጥር ኤቦ አዘመረ
የስየን ኢሊሎላሁ ወጀም አመሰረ
ጥሌልም ተያፍዌ ኣናኘሁ አሰረ
ጠለማ የጌና በስማት ተቀጠረ
የጉልማሳ ሱምቱት በጌመሁ አደረ
ቴጓጂ ያለቢዬ ዋነኘሁ ሀተረ
ጠረቂ አያነሁ ቴመግ አቸፈረ
የሰብ ውዶ ሌንቦ ያላልት አቅባጠረ
የደነቦ ቁሪት ቤተተም ሸጠረ
ወዮ ምን የጥቀሌ ባረም በቅረር ባፌጀረ
የመቃ ዘራማ ተያድግ አማከረ
ገንበጣም እማረሁ ቴጨን አባረረ
ሻተሁ ቢጭየን ንበሁ ውረሁ ባበረረ
ያዝማ አውሎ ብላት በጀፏር አሴረ
ዝኘሁታ ያገርዜ በህር መገን ባረ
ቲይውጂም ባንሰማ ቀልበሁ የዶረረ
ቲቧረ የላህዊ ኑደሁ ሸገረ
የሸጓረ ቲሮጥ ቅስመሁ የሰበረ
ያምሻሸ ኤማራት ቤማደረ
ቴቴው ቴብር ሮጠም ርዝቀሁ አቴጠረ
በዱግዱግ ነብሲያሁ ዌሻተሁ ቀጠረ
ያሞልጬ ቲቡሪ ቴትመለጥ ዥበረ
መከበቤሁ ሸዊም መቸቤሁ ዥበረ
ገማመውታ አበም ኮረውታ ሃተረ
ቡላሁ ይሜጥሬ መላንቾሁ አሰረ
ሿሞተኘ አግረሁ ተቡሼ ዥበረ
ድቤሁ ተያቴብም ውነኘሁ ቶረረ
ቅረር በስለቸቺ ዜግነት ዶረረ
አማደሁ ቲመላ ሃያትም ደበረ
በዘርቆ ቸኳረ ሴራ ተቄበረ
የቀበጠ ውዶ በጭሰኘሁ ጮረ
አመኛት ቲጠፋ ዜጋ ገኝ ገፈረ
ባሊቅነት ቢረዥ ከዘራሁ ሰበረ
ቢኌ ብኄ ቧረን ተያተርፍ ሰበረ
ቴጓጂ ያለብዊ አኳ ቴሃን ድረ
ዝም አህር የሰለ ቴባንረ ንቡረ
ዥማር ጨኘተና ባወኖይው ጡረ
የሶሬሳ ዘርንኩ ባረም ባዘመረ
ቴድገልል ጓማውታ ወቤት ባቴደረ
ወጠቀም ተነሳም ባናተዠ የመስቃን ንቡረ
ወዝገብ ያገርድም አመት የትገደረ
በርቼሁ ባንገፏረን በዘረሁ ባሴረ
ጢሮውታ አናውጣ ግርዝናም አንወረ
ጓሳሁ ስበሰበም ቦላሁ ባማከረ
ቴን ይቀርብ ቅንብ ቅረር ባፌጀረ
ቢፍተሁ ያነ ዲናሁ ወጂሌ ቦረሶ ባረም ባዘመረ
የስለተተ ሱልቱት የሁቲ ባንበደረ
ሁቲ መስቃን አንከን ዘረሁ ገኝ የግፍረ
ጨኘት አትኔጠበም አሴደበም ንቡረ
ያባየውታ ሴዞ ጀባውታ ባዦረ
የደነውታ ፉላ መስቃን ባመሰረ
የሜጠቀሁ ቅበት በሳት ባትሜጔረ
ወዘብር በቄሟን ያባየውታ ንቡረ
ሁቲ ገሜ አንሃን ገኘሁ የትገፈረ
ሸጓረሁ ይሰሌ ቅረር ባፌጀረ
ጫተሁ በሽመሸመ በገባት ቅረረ
ዲና ጬፈም ባዥን ጭጭሳሁ በዦረ
ሁቲ መስቃን አንሃን ዘረውታን የጠረ
ወንክሳሳ ቴትቄም ጦቀሰም ባደረ
ያናተሁውታ ዳኮ ቤወደቹ ቃር
ጊናት በህሟተተን ሶሬሳ ባንሃረ
በርቼሁ ቴድበበር ጨኘት ቴሽጋግረ
መላሁ የሳውነም ወለባሁ ቴቀጥረ
የሰበር የሰተር ቀንመሁ የሰበረ
መስቃን አሴደበም ፈረዝ ዋዜ ቴሃን ቀበረውታን የወረ.
ዝም አህር የሰለ ንቡር ቴባንረ
ዥማር ጨኘተና ባወኖይው ጡረ
(አወል አህመዲን)