"ማልም ቴሰጅና" (በአወል አህመዲን)

እሜት ቴሞሽርያ እንጨረቤ ቧርያ

የሻሜት ጥወ ሃም ሟለም ቢሽመሽሙያ

የጭየ እንዝኔታ ትሸክቴ ፈያ

በሰብ አትሰሄ አውሌነና ጩጥያ

ክናን ኤምሽናዬ በዘንጋ አቦረሺያ

ውየት ይጀርያዬ በተን አትቄቄጭያ

ዘሬት ኤበዛዬ የንቅ አባ ሮስያ

ባመል ፈይነቴት የንቅ ዳኮም ቧርያ

እንስ አማቸባ ተብስ አናሟያ

ጨነት ቲዬልቅባ ዥንት ሰብረኘያ

ቡጦ አለቀችም ታትጨኝ እምያ

ታታገባ ዳኮ ገጌት የቅየችያ

የፈርድ ኤቀብጭባ ቀል አቲብ ዋቢያ

የቡሼ ቲትሟነያ ትማች አያንቱያ

ኦለኘ ታትላኝ ቡሼሁ ትጠላያ

የድረ ቃር ቲሰልያ ባውዶት ንቡረኘያ

እሜት መከከፌ ደልጩማ ትሀያ

የሶሬሳ ትሃ ቁናሜት ፉኩንያ

መቸቤ ቴሰጅያ በጅ ያለቀችያ

ያዥሁን ናውድና ይንም ጨኘት ጡርያ

ብርዛዝ ቢያትሜካ በሡት ትፈታያ

ጀማ ኤትመካዬ ሙጥርያ ጥቁንያ

ቋለምሸሼት ብዥው ቤነብናም መፉያ

ዡዡት አንቄመና አናላች ዥንትያ

መሶ ይዶቴታ ተዘርም ጃሚድያ

ኤመኘ መሸወም ሜጠቅ አነለፉያ

የቁና አንቧ ጀንጂን የጃንሆይ ጨኘትያ

ቢሰሊ ኤፏጂ ሙላያ በህርያ

ሟንያ ብትብሬ የከከፌ ትሃ ሽሜት ደልጩሜያ

ፋፍነት ያቴዥች ይንሽታ ሙጥርያ

ምን ንበር ናውድና ኤቀብል አማህላያ

ሙርቾዬት ቢፏቼ የወክት ዱሬሻያ

ባበችም ቀል አቲብ ከስበኘ ፈያያ

ስትዬት አቸንባም ዛለ ይትቄቧርያ

ያዝጋግ ደረመኘ አግር ኤሰላና ጂበኘ ቻቺያ

ይንጠላፏት ጢሮ የድረ ደም ቢሰሊያ

ቀችም አንባረና በዋጂ ያጬማች ታሰላ ንቡረኘያ

ቶኛት አወነባም በእሁታም አንፋዌሪያ

ፈሮተኘ መሶ ቀቀቤ ቤለያ

ቾናች አንስማተች ፈረዝም ታስርያ

ዘበን ቲሽጋገር ጡር ኤሎ ቴቡሪያ

የበህር ቧቄልም አረጅም ቀቧያ

ሂኔት ህመተተም እርስትም ቢሰጅያ

ዛ... ዝቱ አንባረች ታታቄም ዋቢያ

ያብሌላ ጦቃሺ ባዝጋግ ቴቦርሽያ

ሃቲሜት ተፈያው በውዶ አንጠረያ

ማልም ቴሰጅና ያናግባች የጡር ዕን እሚያ

ትትሟት በኩናም በቁም ፏሄ ቧርያ

ሟንያ ብትብሬ የከከፌ ትሃ ሽሜት ደልጩሜያ

ጔታ የድግና......!!

(በአወል አህመዲን)