የንቡር መየውታ በሀሙሴ ሻሜታ
ባተክል እንቡሽቡሽት በፌረች ጔዜታ
ስርም አማለለች ቢተሚ አጄታ
ባቧራት ጪኮዬት በውሪበ ብቅሌታ
በዥንት ገቤታ ተዌሻት ድቤታ
ሂኔት አንቀበለ ፈረንክ አሳቤታ
ጅጌ ቲያትቋጥር ትስሀስህ አህሬታ
ወጌጠና ባረች ብቅል ሙጥሬታ
እንቁብየት ቲወዛ ትሼሽ ጭኮዬታ
አጄት የሞጠለው ትሜዝን ከኔታ
በገኝ የትሜጠረች ባልቴትያ እሟታ
ከኔት ትትቅራረብ ታጠርቅ ብቅሌታ
ገመያ ይሠጬ ታገብር ዛሌታ
ብቅል ኤሁመጥጤ ታቴጥን ጥዌታ
ሙላ ትጔጭንም ሽንጥር ዘንግሬታ
ተጔዝ ቢቸንባ ኤቀብል ሙሌታ
እሙጥ ቴህረድዳ ትቤቂል ብቅሌታ
ትስናጅ ሲናርያ በቃቃት ጅቤታ
ስርም ትጔጭንም በተት ሦረሬታ
ጅጌ አጅገጀገም ሆ ቢብር ቤቴታ
አትም ኤቀብልባ ዘንግር ስብሳቤታ
የፉጃ አገባም ጋራምባት ምሴታ
ገረድ ያያንቱያ የትቀበር ፉጄታ
የስባና አጄታ የትቀንፋ ሻሜታ
ሁቲ ይቀምስና ያወኔ ፊጭታ
የንሽታ ቁርቤታ ቢተም አሰሌታ
ኌት ነብስ ኤሶታ የምሽት የወጌታ
ስርም አጥራማችያ ጉኒ የቁርቤታ
ዘንግር ተሻመሀም ባሶ በቋሬታ
ገሜ ተውራረዶም ትታቀርብ ዶጬታ
ቦራ በፏቸ ሀም ሙላ ባቤቴታ
ቃቃት ዘንግሬታ ቢደንቂ ጅቤታ
ሙላ ተቄበረች ፉጃ አወነና የዘር ዝሬቴታ
መላም አንቀበለ ስብሳብ ሠሌኔታ
ኢፍትፍት አወናች በቸፋት ዛሌታ
አሙስ ቢምሻሽባ ያዳረ ሽሜታ
ትትስሀስህ ዋለች የመናግ ተሬታ
ስርም አንገፈረ የፉጃ አችቤታ..!!
አችቤታ....!!!
(በአወል አህመዲን)